Pulso entre a OTAN e Rusia pola tensión na fronteira con Ucraína


Nunha reunión de ministros de Exteriores da Alianza en Riga, a capital de Letonia, o secretario xeral da OTAN, Jens Stoltenberg, advertiu a Rusia sobre o aumento de tropas rusas preto da fronteira con Ucraína, o que tamén xerou preocupación en Estados Unidos e a Unión Europea.

«Haberá un alto prezo que pagar por Rusia se unha vez máis usa a forza contra unha nación soberana independente, Ucraína. Demostramos a nosa capacidade para impoñer sancións económicas e políticas”, asegurou Stoltenberg.

Falando por videoconferencia nun foro de investimento celebrado en Moscova, o presidente ruso Vladimir Putin asegurou que se se colocan mísiles occidentais no país veciño, Rusia despregará os seus.

«Se no territorio de Ucraína aparece algún tipo de sistema de ataque, o tempo de voo ata Moscova será de 7 a 10 minutos, e 5 minutos no caso de que as despregadas fosen armas hipersónicas. Entón teriamos que crear algo similar en relación con quen nos ameaza desa forma. E agora xa somos capaces de facelo», dixo Putin.
Stoltenberg instou a Moscova a volver participar no Consello da OTAN, ao mesmo tempo que se referiu ao tema da proliferación nuclear, esixindo a todos os países transparencia para ofrecer unha maior seguridade global.