A Rusia complícaselle o recrutamento dos 300.000 reservistas que pensaba enviar á fronte en Ucraína. Aos intentos de deixar o país por parte de miles de persoas súmanse as queixas pola falta de armamento e o pouco adestramento que reciben algúns soldados antes de ser enviados á fronte. Os expertos afirman que se tardará meses en adestrar aos mobilizados. O ministro de Defensa, Sergey Shoigu, supervisou persoalmente o adestramento dun grupo de recrutas en Alabino, preto de Moscova.
Pola súa banda, o Patriarca ortodoxo ruso Cirilo chamou a unha mobilización espiritual que contribúa á reconciliación con Ucraína. Hai dous días, xa dixo que os rusos que morresen en Ucraína lavarían os seus pecados. Con todo, moitos rusos saíron á rúa para protestar contra calquera tipo de mobilización. Polo momento foron detidas unhas 2.400 persoas, o que provocou a alarma das Nacións Unidas.