O expresidente do Goberno, Mariano Rajoy, asegurou este xoves que «non sería bo» que se repetisen as eleccións xerais en España, e desde o seu punto de vista o mellor agora mesmo sería conseguir un goberno moderado e cunha maioría estable. Por iso, recomenda unha alianza PSOE- Cs, a cal tería un apoio de polo menos 176 deputados. Con todo, esta fórmula parece «pouco probable».
No ‘Foro Premium do Atlántico’ organizado en Tenerife, Rajoy apuntou que lle corresponde a Pedro Sánchez «tomar a iniciativa» como gañador das eleccións, lembrando que el propuxo en 2015 a creación dunha ‘gran coalición’ PP-PSOE que non prosperou.
O expresidente tamén defendeu que o novo goberno non derrogue as reformas económicas emprendidas na súa etapa «porque funcionaron», e en particular citou a reforma laboral, que foi «decisiva», a lei de estabilidade e a reforma enerxética.