A Consellería de Medio Ambiente, Territorio e Vivenda reactivou este xoves a última fase do concurso de recollida de pilas en centros escolares no marco da campaña Pilabot, que este ano celebra a súa segunda edición coa participación de 150 centros educativos de primaria e secundaria.
O certame, organizado en colaboración cos Sistemas Colectivos de Responsabilidade Ampliada do Produtor de pilas e acumuladores autorizados en Galicia (Ecopilas, ERP e ECOLEC), suspendeuse de maneira temporal o pasado mes de marzo por mor da crise da Covid-19. Nese momento, algúns dos colexios inscritos atopábanse aínda en pleno período de recollida de pilas polo que non puideron completar a súa participación.
Por esta razón e coincidindo coa volta ás aulas dos estudantes de educación primaria e secundaria, a organización de Pilabot decidiu retomar as accións pendentes durante o mes de outubro para dar así por concluído o concurso. Desta forma, 55 colexios e institutos de distintos puntos de Galicia poderán retomar desde mañá a recollida de pilas entre o alumnado e completar así as seis semanas lectivas establecidas nas bases do concurso.