A Xunta vén de finalizar con normalidade as oposicións multisede para 305 prazas do grupo C2 Auxiliares de enfermería. A estas probas estaban convocados un total de 3.583 aspirantes dos que finalmente se presentaron 1.980, polo que a porcentaxe de participación foi do 55,3%.
Os exames celebráronse de xeito simultáneo e en dúas quendas sucesivas no recinto da Feira Internacional de Galicia en Silleda, no Pazo de Feiras e Congresos de Lugo e no recinto da Fundación de Feiras e Exposicións de Ourense.
A Xunta reanudou neste mes de marzo os exames de oposicións con todas as garantías sanitarias logo de que as autoridades sanitarias autorizaran a súa celebración seguindo protocolos de actuación que garanten a súa realización con seguridade e conforme aos principios de igualdade, mérito e capacidade.