Os Bombeiros de Betanzos encargáronse das tarefas de rescate do falecido, que se atopaba nunha zona de marisma, baixo o viaduto da autopista, á altura do quilómetro 9 da AP-9-F, en Bergondo. Un particular chamara ao 112 para informar de que unha furgoneta levaba un tempo prolongado parada na marxe da autopista, sen sinalizar.
O 112 Galicia tras ter constancia dos feitos solicitou a intervención dos servizos de emerxencias: o persoal de Urxencias Sanitarias de Galicia-061, a Garda Civil, os Bombeiros de Betanzos e a Agrupación de Voluntarios de Protección Civil de Bergondo desprazáronse ata o lugar.
Nun primeiro momento, a proximidade do corpo coa auga fixo pensar na necesidade de efectuar a operación a bordo de medios acuáticos, pero finalmente púidose acceder por terra. Así, os Bombeiros fixeron uso dunha padiola de rescate para trasladar o corpo da persoa a unha ambulancia, que os esperaba nas proximidades. Os servizos sanitarios confirmaron o seu falecemento.
No operativo tamén participaron axentes da Guardia Civil de Tráfico e operarios de conservación das estradas.