O Goberno británico elevou a «grave» o seu nivel de alerta nacional por terrorismo mentres a Policía interroga a catro sospeitosos tras a explosión dun taxi fronte a un hospital de Liverpool, que deixou un morto e un ferido este domingo. Pola súa banda, o primeiro ministro, Boris Johnson, subliñou a valentía dos seus concidadáns. A explosión produciuse no interior dun taxi que acababa de estacionar ante as portas do hospital, segundo as pescudas policiais, despois de que o pasaxeiro detonase un dispositivo improvisado de fabricación caseira, provocando a súa morte e lesións ao condutor do coche. Os axentes interrogan polo momento a catro sospeitosos, tres deles -homes de 21, 26 e 29 anos- detidos na área de Kensington da citada cidade inglesa e un cuarto cuxo arresto se efectuou este luns. Por agora descoñécese que foi o que provocou o atentado, segundo recoñeceu nun encontro previo con medios de comunicación o subinspector da Unidade Antiterrorista do corpo policial de North West, Russ Jackson.
36