O Bergantiños renaceu este domingo en Luanco cunha remontada apoteósica na segunda parte do encontro que xogou fronte ao Marino nesa localidade asturiana. Foise ao descanso, tras unha mala primeira parte, perdendo 1-0 e no inicio do segundo tempo caeu outro gol de libro. O equipo carballés perdía por 2-0 no minuto 48 e terminou gañando o partido por 2-3. Posteriormente, tras o 2-0, José Luis Lemos moveu o banco, quitou a Remeseiro e Meixús por Adri Pérez e Espeso. O equipo reaccionou e recortou distancias establecendo o 2-1 cun gol de Charly aos 58 minutos de partido. Sumou outra vez o equipo visitante catro minutos máis tarde, no minuto 62, a través dun tanto de Palomares, 2-2. De novo marcou o conxunto carballés, que cambiou as tornas no marcador logrando o definitivo 2-3 cun tanto de Alberto Espeso no minuto 74. Con este resultado o Bergantiños rompe unha moi mala serie de resultados, suma oito puntos e ascende ao posto 13 da táboa clasificatoria, a próxima xornada xogará na casa contra o Compostela, que ten un punto máis e tampouco está para tirar cohetes.