A Consellería de Infraestruturas e Mobilidade completou a renovación do firme nos accesos ao hospital de Calde, en Lugo, e xa deu comezo a executar as melloras no Hospital Universitario Lucus Augusti (HULA). Ambos proxectos forman parte do contrato para acondicionar accesos aos centros hospitalarios da provincia de Lugo, incluídos os de Monforte de Lemos e Burela, que conta cun orzamento de 486.000 euros.
Os traballos no Hula consistirán na mellora do firme mediante a extensión dunha nova capa de rodaxe con mestura bituminosa en quente no exterior da zona de Urxencias. O espazo de actuación corresponde cos viarios e o aparcamento desta área, que ocupa unha superficie pavimentada de 6.413 metros cadrados.
No caso de Calde, as obras están finalizadas e unicamente queda pendente completar a sinalización. Ademais de reforzar o firme nos accesos e na zona sur, reservada para aparcamentos, o proxecto incluíu a mellora dos separadores vexetais en mal estado. Para iso, proxectouse a retirada e posterior reposición da capa de terra vexetal e a plantación de céspede. Ademais, colocouse un bordo de formigón en todo o perímetro.
Tamén se habilitou un pequeno itinerario peonil no acceso ao hospital para facer máis seguro o tránsito a pé. A zona de actuación nesta infraestrutura sanitaria ocupa unha superficie total de 10.155 metros cadrados.
O delegado territorial da Xunta en Lugo, Javier Arias, visitou as obras.