O conxunto do Racing de Ferrol saíu mellor plantado de inicio ao terreo de xogo, de feito, froito dese dominio, ao cuarto de hora adiantáronse no electrónico grazas a un gol de Joselu ao rematar ao primeiro pau un bo centro desde a dereita de Seoane. O gol pareceu espertar ao equipo que dirixe Yago Iglesias, e mesmo puideron marcharse ao descanso logrando empatar a contenda, pero o meta local Diego Rivas impediuno en varias ocasións. Tamén os locais contaron con algunha ocasión para ampliar a vantaxe. Os segundos 45 minutos empezaron de maneira inmellorable para o Compostela, xa que aos dez minutos logrou o empate desde os once metros, ao aproveitar Pablo Antas a pena sinalada polo colexiado tras a “man” do defensa racinguista Yeferson Quintana. Ao final repartición de puntos no derbi da xornada da categoría de bronce, que deixa máis contentos aos santiagueses por rascar un punto nun campo difícil.