- O Helimer trasladounos ao aeroporto de Alvedro para ser atendidos polo 061
Dúas persoas foron rescatadas na tarde deste xoves polo equipo de Salvamento Marítimo despois que a súa embarcación naufragase a cinco quilómetros da costa nas proximidades do Monte Louro, no concello coruñés de Muros.
Segundo se lle indicou ao 112 Galicia, os tripulantes contactaron con Salvamento Marítimo arredor das 17:00 horas para solicitar axuda tras darse conta de que o pesqueiro ía afundirse. A embarcación Salvamar Regulos foi quen recolleu ás dúas persoas, que finalmente foron evacuadas no helicóptero Helimer ata o aeroporto de Alvedro para ser atendidas polos sanitarios do 061.
No operativo de rescate tamén participaron o Servizo de Gardacostas de Galicia, os membros do GES de Muros, axentes da Garda Civil e efectivos de Protección Civil da localidade.