Unha muller foi rescatada na mañá deste domingo tras caer nunha tumba aberta, duns cinco metros de profundidade, no cemiterio da localidade ourensá de Santa María, en Castrelo de Miño.
O 112 informa que recibiron a chamada dun particular que indicaba que era necesaria a intervención de equipos de emerxencia que puidesen achegarse até a ferida, que estaba consciente e orientada.
Así, a central de emerxencias solicitou a colaboración dos profesionais de Urxencias Sanitarias de Galicia-061, dos Bombeiros do Carballiño e dos efectivos do GES de Ribadavia.
Unha vez no lugar, os equipos de intervención usaron unha padiola e rescataron a muller, que recibiu atención médica por parte do persoal sanitario. Tiña fortes dores nas costas.
O operativo foi completado polos axentes da Garda Civil e desde o 112 avisaron os membros de Protección Civil da localidade, por se fose necesaria a súa colaboración.