Restablecida a totalidade dos servizos de autobús entre Ponteceso e A Coruña


A Xunta restablece desde este mércores a totalidade dos servizos de autobús entre Ponteceso e A Coruña, aumentando de 5 a 7 as expedicións diarias.

Unha vez levantadas as restricións por mor da covid-19, o Diario Oficial de Galicia publicou a resolución da Dirección Xeral de Mobilidade que establece que a partir do 1 de xullo se deberán repoñer o 100% dos servizos de autobús de competencia autonómica dentro da mesma provincia.

Co restablecemento de todas as liñas e frecuencias, a partir de mañá disporanse dúas saídas de Laxe, ás 8 e 12,45 horas; unha de Corme, ás 7,30 horas; e catro da Coruña, ás 11,25, ás 15, ás 16 e ás 18,15 horas. Estes percorridos realizarán as súas correspondentes paradas en Ponteceso.

A Xunta, no marco do novo Plan de Transporte Público de Galicia, está a licitar o contrato de servizos de autobús para o norte das comarcas de Fisterra, Bergantiños e A Coruña, que inclúe as citadas expedicións entre Ponteceso e A Coruña.