- O veleno destes animais pode ser perigo para os seres humanos
Algúns areais dos municipios de A Laracha e Ponteceso recibiron estes días a chegada das carabelas portuguesas, as “falsas medusas” velenosas que invadiron parte do litoral galego arrastradas polo temporal marítimo dos últimos días. Concellos como Ferrol ou A Coruña decretaron o peche de varias praias por precaución, un exemplo que seguiron Ponteceso e A Laracha.
Na praia larachesa de Caión apareceron decenas destes animais nas zonas das Salseiras e do Caracoleiro, tal e como comprobaron este luns o alcalde, José Manuel López Varela, e o concelleiro Jesús Souto.
A Agrupación de Voluntarios de Protección Civil da Laracha encargouse da retirada destes exemplares, cuxo veleno pode ser perigoso para os seres humanos, polo que se procedeu á respertura da praia.
Carabelas en Niñóns e A Barca, Ponteceso
Protección Civil de Ponteceso tamén puxo en marcha no día de onte un operativo para retirar varios exemplares de carabelas portuguesas que se atopaban en Niñóns e A Barda.
O Concello decretara este domingo o peche das praias como medida de precaución pero o acceso ás mesmas xa está permitido, aínda que durante os próximos días recoméndase manter as medidas preventivas.