No segundo ano en vigor deste plan de retirada, a empresa pública Seaga encargada da encomenda da retirada dos niños desta especie nos 300 concellos galegos adheridos -o 96% do total-, eliminou un total de 14.651 niños desde xaneiro. Con este plan, unha vez recibida a chamada no 012, actívase o protocolo e contáctase co axente encargado de atender o aviso para determinar a actuación que procede. Na maioría dos casos retíranse nun prazo máximo de 5 días hábiles, salvo nos niños de difícil acceso ou que requiran actuacións complementarias ou permisos, nos que o prazo pode ser maior.
Por provincias, destaca Pontevedra con 5.772 niños eliminados ou neutralizados seguida de A Coruña con 5.611, mentres que en Lugo e Ourense se retiraron 1.769 e 1.499 niños respectivamente.
Ao igual que o ano pasado, na época estival rexistrouse o maior número de avisos co máximo de chamadas no mes de agosto cun total de 6.300. Por iso, entre mediados de xullo e outubro, a Xunta reforzou a liña específica do Teléfono de Atención e Información á Cidadanía 012 para atender os avisos de niños de velutina estendendo a súa cobertura a tódolos días da semana en horario entre as 08,00 e as 20,00 horas, mentres que o resto do ano está activa de luns a venres tamén nese horario e os sábados de 08,00 a 17,30 horas.