- As actividades quedaran paralizadas co inicio da pandemia
O alumnado do programa ‘Ruralízate’ puido retomar esta semana as clases dos obradoiros de restauración de mobles e traballos manuais tras paralizar a súa actividade no 2020 debido ao inicio da pandemia. Esta iniciativa está organizada polo departamento de Servizos Sociais do Concello de Cabana en colaboración coa Asociación Íntegro.
Estas sesións, destinadas a persoas maiores de 55 anos, seguiranse impartindo de xeito semanal no Centro Íntegro en Nantón e nas instalacións dunha nave na parroquia de Anós. A previsión é rematar a programación desta edición no mes de decembro, aínda que desde o departamento de Servizos Sociais xa anunciaron que haberá novas actividades.
Nesta liña de reiniciar a actividade previa ó comezo da pandemia, o centro de maiores de Neaño comezará a estar dispoñible de novo para toda a veciñanza a partir do mércores 13 de outubro. O servizo estará activo de luns a venres en horario de 15:30 a 20:00 horas.