Rodrigo Rato pediu este venres a nulidade do novo proceso xudicial que arrincou na Audiencia Provincial de Madrid e que estenderá as súas sesións ata finais de maio. O que foi o ‘súper ministro de Economía’ do Goberno de José María Aznar defraudaría 8,5 millóns de euros e a Fiscalía pide para el unha pena de cárcere que ascende aos 70 anos por 11 delitos contra a Facenda Pública, un delito de branqueo de capitais, outro de insolvencia punible, outro de corrupción nos negocios, e outro delito continuado de falsidade en documento oficial e mercantil no marco da causa sobre o presunto incremento ilícito do seu patrimonio. A súa defensa pediu que se anule a causa, porque considera que está baseada nun rexistro que vulnerou o seu dereito á intimidade e a inviolabilidade do domicilio e que respondía a unha denuncia «mendaz» da Fiscalía.