Pere Aragonès foi recibido polo papa Francisco no Vaticano, durante o seu encontro, de preto de media hora, abordaron “a actualidade política en Cataluña e en España”. Segundo o ‘president’ catalán, o pontífice expresoulle “que o camiño sempre é falar entre diferentes para poder chegar a acordos”.
“Tiven a oportunidade de comentar co Santo Pai a situación política, a actualidade política en Cataluña e en España. E neste sentido, reafirmei a miña aposta polo diálogo, a negociación e a necesidade de chegar a acordos que permitan resolver todos os conflitos”, dixo Aragonès aos medios tras reunirse con Francisco, ao que agradeceu a súa amabilidade e a súa dispoñibilidade para escoitar os seus posicionamentos.
Preguntado sobre se se abordou o tema da amnistía, o presidente da Generalitat asegurou que Francisco “ten interese en todo o que son cuestións que interesan ás persoas”, pero evitou dar máis detalles. “O papa é un bo coñecedor da historia política de España e de Cataluña. Hoxe púideno comprobar e evidentemente hai cuestións que falamos”, concluíu.