Rusia destrúe unha refinería ucraína en Odesa


Varios mísiles impactaron este domingo nunha refinería na cidade ucraína de Odesa, no sur do país, sen que polo momento se rexistraran vítimas, segundo informou a medios locais o coronel do Comando Operativo Sur do Exército de Ucraína, Vladislav Nazarov. As explosións deixáronse sentir a quilómetros do lugar e do complexo da refinería levantáronse tres columnas de fume negro visibles desde toda a cidade. Rusia confirmou o ataque e afirmou que os mísiles destruíron a refinería e tres instalacións de almacenamento de combustible que, segundo o Ministerio de Defensa ruso, eran utilizadas por Ucraína para abastecer ás súas tropas preto de de Mykolaiv. Odesa é a terceira cidade ucraína e o principal porto do país, polo que perdela supoñería un duro golpe para a economía ucraína.