Pedro Sánchez afronta o debate para a súa investidura insistindo na necesidade de diálogo en Cataluña e defendendo o programa de Goberno acordado cos seus socios de Unidas Podemos. Un programa de marcado carácter progresista que cualificou de “patriotismo social”. Sánchez tamén afeou á dereita o bloqueo político. “Non se vai a romper España e non se vai a crebar a Constitución. Aquí o que se vai a romper é o bloqueo ao Goberno progresista votado democraticamente polos españois”, dixo para comezar o seu discurso. Ademais, dixo sobre Cataluña que “hai que retomar a política e deixar atrás a xudicialización do conflito”.
Pedro Sánchez chegou a este debate cos números xustos para ser investido na segunda volta deste martes grazas ao pacto con Esquerra Republicana de Cataluña polo que se absterán os seus 13 deputados a cambio de abrir unha mesa de diálogo para abordar o conflito.
Algo que para a dereita supón a ruptura de España: “Hoxe vimos que falaba vostede de mentiras. Dicía, ‘este Goberno vai combater as mentiras’. Oia, se vostede é unha mentira andante. Fala vostede de combater as fake news e vostede é un presidente fake”. Pablo Casado recuperou o seu discurso máis duro en competencia co líder do ultradereitista VOX, Santiago Abascal, quen tamén dedicou insultos a Sánchez. Mentres, unhas 15.000 persoas marcháronse cara ao Congreso nunha manifestación en defensa da unidade de España. Convocada pola sociedade civil, a marcha criticaba o acordo entre PSOE, Podemos e ERC, con consignas como “con terroristas non se negocia”.