O presidente do Goberno, Pedro Sánchez, e o presidente da República Francesa, Emmanuel Macron, conversaron telefonicamente por espazo de 45 minutos para repasar o camiño do Cume da OTAN, que organiza España e celebrarase en Madrid o 29 e 30 de xuño. No Cume, os países membros da Alianza Atlántica aprobarán o novo Concepto Estratéxico para os próximos 10 anos.
É a primeira comunicación oficial que Macron mantén cun xefe de Estado ou de Goberno desde que Francia asumise a presidencia de quenda da UE. O presidente Pedro Sánchez desexoulle sorte durante este semestre rotatorio e recalcoulle a necesidade de reforzar o vínculo transatlántico entre a UE e a OTAN para facer fronte ás ameazas globais. Igualmente, Sánchez trasladou o apoio de España en seguir traballando para potenciar a política común de Seguridade e Defensa. En concreto, o necesario impulso ao Compás Estratéxico da UE, ademais de avanzar no Pacto Migratorio da UE.