A Audiencia Nacional declarou absolto ao expresidente do FC Barcelona Sandro Rosell, que se enfrontaba a 6 anos de cárcere tras case dous anos en preventiva, de branquear comisións recibidas polo expresidente da Confederación Brasileira de Fútbol Ricardo Teixeira ao aplicarlle o principio de «in dubio pro reo», en caso de dúbida fállase a favor do reo.
Ademais de Rosell, tamén resultaron absoltos outros cinco acusados de branquear 20 millóns de euros desas comisións polos dereitos audiovisuais de 24 partidos da selección brasileira de fútbol e dun contrato con Nike. Trátase do avogado andorrano Joan Besolí, que do mesmo xeito que Rosell pasou 22 meses en prisión preventiva e como el quedou en liberdade ao comezo da vista oral; a súa esposa, Marta Pineda, o cidadán libanés amigo de Rosell Shahe Ohanneissian e outros dous presuntos homes de palla, Pedro Andrés Ramos e Josep Colomer.
Na súa sentenza, da que foi relator Anxo Furtado, a sección primeira do Penal da Audiencia Nacional explica que tras analizar a proba practicada no xuízo «non se puideron acreditar as acusacións e, por tanto, ante as dúbidas sementadas, debe primar o principio de in dubio pro reo». Ao finalizar o xuízo, o fiscal rebaixou a petición de pena para Rosell de once a seis anos de prisión, do mesmo xeito que fixo para o resto dos acusados: de dez a cinco anos de cárcere para Besolí, e de sete a un ano e once meses para a súa esposa, Marta Pineda. Para os outros tres presuntos homes de palla, para quen pedía entre seis e oito anos de cárcere, acabou solicitando penas dun ano e once meses de prisión ou dun ano e seis meses.