Tras moitas denuncias, a Xunta vén de declarar finalmente a caducidade das concesións mineiras de Santa Comba, que afectan tanto á histórica mina de volframio de Varilongo como ao novo proxecto de mina a ceo aberto de Corcel Minerals en Castriz.
Así o celebra Ecoloxistas en Acción tras anos de batalla pola liberación deste espazo, pero ao mesmo tempo esixe á Xunta que obrigue á mineira australiana a constituír un aval de como mínimo 5 millóns de euros para facer frente á restauración, peche e clausura da mina. Entenden que “o plan de restauración aprobado en 2011, cun irrisorio orzamento de 53.000 euros e nunca sometido a participación pública, é totalmente insuficiente para facerse cargo do peche e clausura da mina, cun custo real de restauración será de varios millóns”. Esperan que non aconteza como no Monte Neme.
Lembran que a mina de estaño e volframio, propiedade da mesma empresa australiana que pretende reabrir as minas de San Finx, leva abandonada dende 1986, fai máis de 30 anos.