- A campaña contará con dúas fases, e vertebrarase en tres eixes: viaxar en familia, parques e xardíns, e gastronomía
O concelleiro de Turismo, Sindo Guinarte, e a xerente de Turismo de Santiago, Flavia Ramil, presentaron «Santiago de Compostela. A túa historia», unha nova campaña de promoción turística que ten por obxectivo reactivar a demanda turística da cidade o antes posible no complexo contexto da Covid-19. Os eixes principais desta promoción son tres: viaxar en familia, parques e xardíns e gastronomía.
A campaña terá dúas fases. A primeira comeza este xoves 23 de xullo, aproveitando a presenza mediática da cidade con motivo das festas do Apóstolo, e prolongarase durante o mes de agosto.
A segunda fase da campaña desenvolverase no último trimestre do ano. A intención de Turismo de Santiago é que esta segunda parte sirva para atraer turistas de cara ao Nadal, pero tamén que sirva para anunciar o comezo do Ano Santo.