Beatriz Sestayo, xerente da sociedade estatal “Suelo Empresarial do Atlántico”, dependente do Ministerio de Transportes a través de Sepes e xestora de 13 polígonos industriais en Galicia, reuniuse en Mondoñedo coa tenente de alcaldesa, Elena Candia, para expoñerlle as novas propostas para dinamizar e impulsar un polígono empresarial con moi boas opcións de crecemento. En concreto, Beatriz Sestayo avanzou a Elena Candia a vontade de SEA e de Sepes de estudar novas fórmulas para atraer a empresas ao polígono de Mondoñedo.
A xerente de “SEA” e a tenente de alcaldesa coincidiron, ademais, en valorar distintas fórmulas, que serán estudadas de forma conxunta, coas que poder poñer en valor esta área industrial. Na actualidade, lembrou, Mondoñedo é un dos polígonos de SEA no que se ofrece chan baixo o réxime de Dereito de Superficie, un sistema similar ao alugueiro con opción a compra, que permite ás empresas instalarse por menos de 80 euros ao mes (ao redor de 800 euros anuais) durante as primeiras anualidades.
O custo das parcelas elévase levemente durante os seguintes anos, pero os adxudicatarios poderán seguir neste sistema ata 30 anos ou ben optar a comprar a parcela. No prezo de venda descóntase parcialmente a cantidade achegada durante os anos anteriores. Na actualidade, SEA oferta seis parcelas en dereito de superficie, desde os 959’9 metros cadrados ata os 1.441’72, cun canon base o primeiro e o segundo ano desde 791’92 ata 1.382 euros anuais.
Esta área industrial conta cunha superficie bruta de 70.000 metros cadrados, dos que 39.566 son netos de uso mixto (industrial ou terciario), de fácil acceso cara ao norte de Lugo e os portos da Coruña, e con aeroportos próximos, como o de Asturias ou o de Alvedro.