- Os parques empresariais da Laracha, Cee ou Vimianzo sitúanse entre os que absorben os maiores investimentos económicos.
A entidade “Suelo Empresarial del Atlántico”, organismo estatal dependente de Sepes a través do Ministerio de Transportes, situouse como un dos principais operadores públicos de chan industrial en Galicia, tras pechar o primeiro semestre do ano cunha cifra récord na implantación de empresas, con acordos con ata 26 compañías para instalarse nalgún dos seus polígonos.
A xerente de “SEA”, Beatriz Sestayo, puxo en valor os “excelentes resultados obtidos nos seis primeiros meses de 2021, que supoñerán unha importante creación de emprego a medio e longo prazo”, tanto por parte de pequenas e medianas empresas como de grandes compañías, que nalgúns casos, investiron máis dun millón de euros na adquisición de chan.
Na Costa da Morte, o polígono da Laracha absorbe os maiores investimentos económicos, cos acordos con tres grandes empresas, que suman máis de 2 millóns de euros sen IVE. No primeiro semestre pechouse a venda de 17.898 metros cadrados por 1,091 millóns de euros e no segundo, a dúas compañías, de 27.932 metros cadrados por 1,62 millóns de euros.
Tamén Cee segue rexistrando importantes operacións, tras anos sen avances, coas adxudicacións pechadas a seis empresas, tres no primeiro trimestre e outras tantas no segundo, que supoñerán a ocupación de 12.627 metros cadrados. O investimento total das compañías ascende a 749.498 euros.
En Vimianzo o primeiro trimestre supuxo a venda de dúas parcelas, de 2.379 metros cadrados, á compañía Gerca.