A Garda Civil da Coruña detivo a sete persoas e desartellou tres puntos de venda de estupefacientes na denominada operación Masa. A intervención finalizou coa disolución dun grupo criminal especializado no tráfico destas substancias. Compoñentes do Grupo de Información déronse conta da existencia dunha persoa na localidade de Rianxo que supostamente «portaba e exhibía armas de fogo» sen dispoñer da autorización administrativa pertinente para a súa tenza, segundo avanzou a Garda Civil nun comunicado. O suxeito xa fora detido en 2018 por feitos similares. Durante a operación os compoñentes do Grupo de Información da Comandancia viron indicios que relacionaban co tráfico e venda de substancias estupefacientes este individuo, que constituía xunto con outros seis un grupo criminal que operaba en Rianxo, Ribeira, Vilanova de Arousa e Vilagarcía. O grupo formábano un veciño de Vilagarcía de Arousa, supostamente o responsable da distribución de substancias estupefacientes; dous veciños de Vilanova, presuntamente responsables do transporte destas; e dous veciños de Rianxo encargados da recepción, a distribución aos puntos de venda e da xestión dos dous puntos de venda desa localidade. A venda a pequena escala na localidade levábaa a cabo, presuntamente, un veciño de Rianxo; e unha veciña de Ribeira, que sería a encargada da xestión do punto de venda desta localidade. A Garda Civil solicitou á Autoridade Xudicial unha orde de entrada e rexistro de diferentes puntos, onde localizaron diversas cantidades de substancias estupefacientes, unha suma grande de diñeiro en metálico, útiles para a manipulación e distribución das substancias e dispositivos electrónicos. A operación saldouse coa detención de sete persoas como presuntos autores dun delito de pertenza a un grupo criminal e dun delito contra a saúde pública. Os detidos foron postos a disposición do Xulgado de Instrución número 2 de Padrón, a Autoridade Xudicial ditou o ingreso en prisión de cinco deles.
37