- Este venres formalizouse o contrato de colaboración entre representantes do Concello, da compañía e da Mostra
A empresa Stolt Sea Farm, dedicada á explotación da acuicultura e que conta cunha planta de produción de peixes planos no Cabo Vilán de Camariñas, volverá a ser un dos principais patrocinadores da XXXI Mostra do Encaixe que se celebrará do 13 ao 17 de abril.
Este venres quedou formalizado o acordo entre a alcaldesa, Sandra Ínsua; a concelleira do Encaixe, Encarna Liñeiro; a directora da Mostra, Dolores Lema e o director de Sustentabilidade de Stolt Sea Farm, Carlos Tavares, nunha reunión na que se estableceron as principais liñas do acordo de colaboración entre ambas entidades.
A empresa aportará unha importante contribución para a promoción do Encaixe de Camariñas co obxectivo de «financiar as actividades que sexan necesarias para poñer en valor á muller como elemento dinamizador do municipio a través da súa labor de palilleira», afirman desde o Concello. Ademais, Stolt Sea Farm organizará unha degustación de rodaballo no recinto da Mostra.