A sociedade mercantil Suelo Empresarial del Atlántico (SEA), dependente do Ministerio de Fomento, contratou a limpeza, roza, eliminación da vexetación e xestión da biomasa vexetal das parcelas do parque empresarial de Cee. A empresa encargada do contrato, tras o correspondente procedemento administrativo, foi “Construcións Juan Lago S.L.”. O importe destinado ao contrato ascende a 5.991 euros e as tarefas iniciaranse a partir do luns da próxima semana.
A xerente de SEA, Beatriz Sestayo, destacou que esta contratación diríxese á mellora da imaxe e o mantemento do parque empresarial, un dos trece que xestiona a entidade en Galicia, co obxectivo de “impulsar e favorecer o asentamento de empresas”. A contratación pechouse menos dun mes despois da reunión mantida pola xerente de SEA coa alcaldesa de Cee, Margarita Lamela, o pasado 11 de setembro, na que acordaron cooperar e traballar de forma coordinada para o desenvolvemento do polígono.
En paralelo, a entidade SEA continuou coa promoción do polígono industrial e as xestións necesarias ante distintos sectores empresariais e económicos encamiñadas a incrementar a implantación de empresas nunha área industrial estratéxica para a comarca.
O parque empresarial de Cee está desenvolto sobre unha superficie bruta de 201.782 metros cadrados dos que algo máis de 106.000 destínanse a parcelas de distinto uso. Segundo establece o contrato, o adxudicatario será o encargado de solicitar e obter as autorizacións e licenzas que sexan necesarias para realizar estas tarefas.