A Asociación Cultural e Deportiva “A Milagrosa” de Carballo acordou suspender, definitivamente, o “I Xantar A Milagrosa”. Devandito evento estaba sinalado para o pasado día 14 de marzo e foi aprazado, sen data, por motivo do Coronavirus COVID19.
En reunión celebrada pola Xunta Directiva da A. C. e D. A Milagrosa, esta acordou suspender, definitivamente, o evento e proceder a devolver o diñeiro ás 660 persoas que confirmaran a súa presenza. O motivo da suspensión definitiva vén dado pola imposibilidade de poder fixar unha data definitiva coa suficiente antelación e garantía para todos os participantes.
“Entendemos que dada a situación de incerteza que se está vivindo non procede convocar o evento. Cremos que unha parte importante de anotados/as non asistiría por medo a posibles contaxios. Non debemos esquecer que se trata dun acto de camaredería con comida-baile e deberiamos gardar unhas distancias de seguridade que non nos permitiría gozar a gusto do acto”.
Aínda que se suspende, non se desiste da idea. Tivo unha moi boa acollida por parte dos veciños e xente de todo o Concello e por iso, en canto as circunstancias o permitan, trataremos de organizala de novo, afirman desde a Asociación.
As persoas que confirmaran a súa asistencia poderán achegarse polo local social da Asociaciación sito na Avda. dá Milagrosa, 6 (sede da antiga Abanca). De luns a venres en horario de 7:00 a 9:00 da noite e os sábados, de 11:00 a 13:00 horas. Para poder recibir a devolución da invitación será preciso presentar o resgardo da mesma.
A Asociación Cultural e Deportiva A Milagrosa quere aproveitar para agradecer a todas as persoas que se inscribiron o seu interese e apoio para a celebración da festa. Así mesmo, e dunha maneira moi especial, quere trasladar o agradecemento a todas as casas comerciais que, desinteresadamente, habían participado achegando agasallos para o sorteo entre os asistentes.