O rescate do transporte aéreo chega ás lineas de bandeira en forma de axudas estatais como a que recibirá Air France de 7.000 millóns de euros. Un diñeiro dos estados aprobado pola Unión Europea e con algunha condición ambiental. Entre outras un 50% de redución de CO2 para voos nacionais a finais de 2024. A renovación de frota con avións máis eficientes. A vicepresidenta da Comisión da UE, Margrethe Vestager, asegurou nun tweet que «as garantías e os préstamos proporcionarán a Air France a liquidez que necesita con urxencia para resistir o impacto do brote de coronavirus ».
A aviación comercial é un dos sectores máis afectados pola crise da COVID-19. O transporte aéreo é un sector estratexicamente importante na UE que representa un 3,3 % do emprego e excede o 4,1 % do produto interior bruto europeo. Tras o parón consecuencia da pandemia as previsións para 2020 apuntan a un esborralle dos ingresos das compañías aéreas do 55 % con respecto ao ano pasado.