A Dirección Xeral de Tráfico pon en marcha durante esta fin de semana unha nova campaña centrada nos motoristas co fin de controlar o cumprimento das normas máis importantes que afectan á condución das motocicletas, especialmente nas estradas preferidas por este tipo de condutores.
Cos datos rexistrados ata o 31 de agosto, 174 motoristas perderon a vida en sinistros de tráfico e, aínda que a cifra é moi inferior á rexistrada nas mesmas datas de 2019 cando faleceron 197 usuarios de motos, non debemos baixar a garda e é necesario seguir lanzando unha mensaxe de prudencia e de respecto ás normas.
Porque, ademais, o 53% dos motoristas falecidos fixérono en fins de semana, especialmente en vías convencionais nas que eses días festivos perderon a vida 79 usuarios de motocicletas, o 45% do total. Os datos reflicten tamén que as fins de semana máis da metade dos sinistros con vítimas motoristas (o 52,1%) son saídas de vía, nas que adoita estar especialmente presente a velocidade excesiva ou inadecuada.
Por esta razón, co obxectivo de tentar reducir os accidentes mortais de motocicletas que se producen especialmente durante eses desprazamentos de fin de semana, os axentes da Agrupación de Tráfico da Garda Civil vixiarán a pé de estrada o cumprimento das normas por este tipo de condutores, ademais de divulgar a importancia do respecto das mesmas.