Unha muller que avistaron flotando na auga, na praia de Pedra do Sal, en Baldaio, Carballo, foi evacuada en helicóptero polos servizos sanitarios de urxencia.
A escasos minutos das 19:00 horas deste domingo, un particular informaba ao 112 Galicia dunha persoa flotando na auga. Nese intre, outro particular indicaba que as persoas que se atopaban na praia conseguiran levala á area e reanimala.
De inmediato, desde o 112 púxose en alerta ao 061-Urxencias Sanitarias que mobilizou un helicóptero ao punto. Ademais, os xestores do 112 alertaron aos efectivos do Servizo Municipal de Protección Civil de Carballo e aos axentes da Garda Civil e da Policía Local. Tamén informaron ao Servizo de Salvamento Marítimo e ao Servizo de Garda Costas de Galicia.
Persoal sanitario confirmou o traslado da muller no helicóptero ao CHUAC.