- O lume orixinouse na vitrocerámica e tan só ardeu a campá extractora
Unha muller tivo que ser trasladada este mediodía polos servizos sanitarios con síntomas de intoxicación debido á inhalación do fume provocado por un incendio orixinado na cociña da súa vivenda, situada na Rúa Reyes Católicos, en Xubia, Narón.
Segundo a información facilitada polos Bombeiros de Narón, que acudiron ao punto nada mais ser alertados polo 112 Galicia tan só ardeu a campá extractora.
O Centro Integrado de Atención ás Emerxencias (CIAE) 112 Galicia tivo constancia do suceso, ao fío das 14:00 horas, grazas á chamada dun particular que indicaba que lle estaba ardendo a campá extractora por un lume que se iniciara na vitrocerámica.
Ata o lugar dos feitos achegáronse os Bombeiros e a Policía Local e comprobaron que eran necesarios os servizos sanitarios para atender a unha muller que presentaba síntomas de intoxicación.