Trece persoas foron detidas este domingo pola súa suposta relación directa ou indirecta coa morte na madrugada do sábado na Coruña dun mozo de 24 anos de orixe brasileira, veciño de Culleredo e que traballaba como auxiliar de enfermería na Fundación Padre Rubinos. A investigación policial céntrase nunha disputa que se orixinou polo uso dun móbil. Os arrestados, identificados e aos que se lles toma declaración, están no cuartel de Lonzas. Pouco antes de sufrir a agresión o mozo falecido, Samuel, estaba canda unha amiga coa que realizaba unha videochamada, que puido causar unha confusión noutro grupo de mozos. A situación derivou na violenta agresión na rúa e a súa posterior morte. A Policía por medio dos móbiles confirmou a identidade da maior parte dos agresores, a maioría deles maiores de idade. Os interrogatorios realízanse por separado para contrastar as versións que poidan ofrecer cada un deles sobre o caso.
35