O delegado da Xunta na Coruña, Gonzalo Trenor, e o alcalde de Laxe, José Luis Pérez, supervisaron os traballos de dragaxe do Porto de Laxe e confirmou que as obras avanzan ao ritmo previsto e finalizarán o ano que vén. O avance nas obras dependerá en gran medida da climatoloxía. Trátase da extracción de áridos e roca do fondo mariño para a recuperación de calado no porto. Esta é unha demanda histórica do Concello porque esta actuación permitirá mellorar a operatividade e a seguridade do peirao. A dragaxe está a realizarse principalmente á cota -5, excepto nunha franxa próxima ao peirao da lonxa que se está realizando á cota -3. O ente público está a investir máis de 3 millóns de euros.
Mellora na lonxa
O representante do Goberno autonómico tamén supervisou as obras de mellora do edificio da lonxa nos que Portos de Galicia inviste 25.000 euros e está previsto que rematen a principios do ano 2021. Os traballos consisten nunha pequena ampliación do edificio coa fin de habilitar unha nova zona de lavadoiro de caixas de peixe. Con esta actuación, a antiga zona de lavadoiro pasará a ser destinada a un novo viveiro. Esta obra dará resposta as necesidade prantexadas polo sector a Portos de Galicia e mellorará as condicións de traballo dos profesionais do mar.
Drenaxe pluviais
Trenor tamén aproveitou a visita para comprobar o resultado final das obras de drenaxe de pluviais no propio peirao que contaron cun investimento de 28.000 euros e permitiron minimizar os asolagamentos que se producen na calzada por mor das choivas abundantes. O ente público centrou estes traballos na canalización e drenaxe das augas que habitualmente se acumulan tralas precipitacións na zona situada entre o paseo marítimo e a Igrexa de Santa María de Atalaia. Esta obra inclúe a construción de dous novos pozos e unha canle de alivio pola escolleira. Finalmente, a actuación incluíu tamén a construción dun murete de protección na zona e a recolocación da escolleira.