Tres persoas foron detidas en Mazaricos e postas a disposición xudicial como presuntas autoras dun delito de homicidio imprudente e outro de omisión do deber de socorro dun home con discapacidade intelectual e que necesitaba de especial protección.
Segundo indica a Garda Civil da Coruña nun comunicado, a investigación comezou o pasado mes de novembro, cando unha veciña da localidade alertou da presenza dun cadáver que non presentaba signos de violencia nunha pista de terra, preto do lugar de Atán. O informe toxicolóxico do corpo revelou a presenza dunha «gran cantidade de alcol» no organismo, que foi a «causa preponderante da morte».
A investigación determinou que o home saíra en perfecto estado de saúde da súa casa pola mañá e que se cruzou con outros tres que regresaban nun vehículo dunha noite de festa, recollérono e levárono ao domicilio dun deles. Unha vez alí servíronlle unha gran cantidade de bebidas alcohólicas de alta gradación, que bebeu de forma inxente e continuada, tendo en conta que a súa incapacidade impedíalle ser consciente dos seus actos e as consecuencias que tal inxesta podería ter, ata o punto de provocar nun primeiro momento o seu desmaio e posteriormente a súa morte, segundo relata a Garda Civil.
Descoñécese se xa se atopaba falecido ou moribundo, pero todo indica que instantes despois, incide a benemérita no seu relato, e utilizando o mesmo vehículo, o corpo foi trasladado e lanzado ao lugar onde posteriormente sería atopado pola súa veciña.
Os detidos, xunto coas actuacións realizadas e efectos aprehendidos, foron postos ao dispor do Xulgado de Instrución Número 1 de Muros.