A pandemia do coronavirus está a deixar moitas imaxes para a historia. Será lembrada, sen dúbida, a do presidente estadounidense, Donald Trump, asinando un paquete de estímulos económicos colosal, por un valor superior aos 2 billóns de dólares, para facer fronte á crise económica causada polo COVID-19. O total triplica os paquetes que se aprobaron en 2009 en pleno furacán da crise financeira e equivale ao 10% do PIB de Estados Unidos, o país máis rico do mundo. As axudas estarán destinadas, fundamentalmente, a paliar os estragos que a pandemia está a causar en empresas, cidadáns e o sistema sanitario.
Wall Street, que anticipara a medida con grandes ganancias nos días previos, perdeu máis dun 3% ao peche do venres, aínda que no conxunto da semana recuperou máis dun 10% do moito perdido durante o mes. Dous datos evitaron que os parqués descorcharan a champaña: o do alarmante aumento do número de contagios no país, máis de 100.000 casos confirmados, e o da cifra de solicitudes de desemprego: máis de 3,2 millóns de persoas foron despedidas a semana pasada, un récord que sorprendeu mesmo aos máis pesimistas e que dá unha idea de que pode pasar nas próximas semanas.
41