Entre o luns 7 e o mércores 9 de novembro, a área de Turismo da Deputación da Coruña desenvolverá un ambicioso programa de actividades no posto propio do Fórum Gastronómic de Barcelona, con oito showcookings e oito degustacións. Neste programa participarán cociñeiros e cociñeiras da Costa da Morte, da Reserva das Mariñas e Terras do Mandeo, de Ortegal e da comarca de Santiago.
“A provincia que sabe” a marca turística e gastronómica da Deputación da Coruña. Trátase, segundo explica o vicepresidente e deputado de Turismo, Xosé Regueira, “de incrementar os esforzos que estamos a realizar para promocionar a oferta turística da provincia desde parámetros de calidade e de sustentabilidade, en liña coas novas demandas da sociedade actual e poñendo enriba da mesa conceptos como o consumo responsable, o turismo consciente, e as potencialidades da economía circular”.
Convén lembrar que o Fórum Gastronomic concentra en Barcelona os principais nomes da cociña contemporánea e as empresas punteiras do ámbito gastronómico.