Os veciños alertan de furtos case diarios e dunha crecente sensación de inseguridade.
Desde UCIN A Coruña queren denunciar publicamente a situación de inseguridade que se vive no barrio de Os Mallos, onde nas últimas semanas se están a producir roubos continuados en coches estacionados na vía pública.
A formación vén de recibir novas imaxes que confirman máis asaltos a vehículos, con cristais rotos, portas forzadas e interiores completamente revoltos. Estes feitos veñen corroborar as denuncias veciñais, que falan de furtos practicamente a diario, sen que ata o momento se teñan adoptado medidas eficaces para poñer freo a esta problemática.
Os veciños e veciñas de Os Mallos trasladan a UCIN o seu malestar, preocupación e cansazo, xa que os ladróns actúan con total impunidade tanto en horario nocturno como durante o día, afectando a distintas rúas do barrio. Esta situación está a provocar unha fonda sensación de abandono institucional e obrigando a moitas persoas a modificar os seus hábitos cotiáns por medo a novos roubos.
Desde UCIN A Coruña consideran inaceptable que un barrio enteiro teña que convivir con este nivel de inseguridade. Por este motivo, esiximos ao Concello da Coruña e ás autoridades competentes a adopción inmediata de medidas reais e efectivas, entre elas:
- Incremento da presenza policial permanente na zona.
- Posta en marcha de operativos específicos de vixilancia.
- Mellora da iluminación pública nas rúas máis afectadas.
- Un plan integral de seguridade para o barrio de Os Mallos.
“Non se trata de feitos puntuais, senón dunha situación reiterada no tempo. Os veciños de Os Mallos non poden seguir vivindo con medo nin sentíndose abandonados polas administracións”, sinalan desde UCIN A Coruña.
UCIN A Coruña continuará escoitando á veciñanza, recompilando información e material gráfico, e non descarta trasladar esta situación aos órganos municipais correspondentes ata que se adopten solucións urxentes.
A seguridade cidadá é un dereito básico, e desde UCIN A Coruña seguiremos defendéndoo con firmeza, conclúen.