Continúa a fuxida desesperada de Ucraína. Segundo o Alto Comisionado das Nacións Unidas para os Refuxiados (ACNUR), máis de 3,7 millóns de persoas saíron do país desde o inicio da invasión rusa, o 24 de febreiro. Hai polo menos outros 6,5 millóns de desprazados internos. Os países europeos teñen as súas portas abertas. Un grupo de 134 ucraínos chegaba en avión a Frankfurt, desde Moldavia. Son os primeiros duns 2.500 que viaxarán a Alemaña desde a exrepública soviética. Moldavia é o país que máis refuxiados per cápita recibiu. Ten 2,6 millóns de habitantes e chegaron xa 100.000 refuxiados. Polonia é o país que máis refuxiados acolleu: máis de dous millóns. O movemento é constante no paso fronteirizo de Medyka. ACNUR traballa alí de xeito conxunto coas autoridades locais e a sociedade civil. Pero en Ucraína segue habendo 13 millóns de persoas atrapadas en zonas de guerra.
42