Ucraína confirma a morte de 60 persoas no bombardeo ruso a unha escola de Lugansk

Ucraína confirma a morte de máis de 60 persoas no bombardeo a unha escola no leste do país. O soto do centro servía como refuxio a case un centenar de persoas das que 30 puideron ser rescatadas. «Unha bomba rusa matou a 60 civís», dixo Zelensky nun discurso por videoconferencia nun cume do G7. «Tentaban refuxiarse nun edificio escolar ordinario que foi branco dun ataque aéreo ruso», engadiu. Na rexión de Donetsk, tamén no Donbás, os ataques non cesaron en toda a fin de semana. Na costa ucraína as explosións volveron a soar este domingo no importante porto de Odesa, no Mar Negro, que Rusia atacou o sábado con seis mísiles de cruceiro, mentres que os disparos de foguetes danaron uns 250 apartamentos, segundo o concello.