Ucraína e Rusia deron o paso para desbloquear a exportación de 22 millóns de toneladas de cereais ucraínos no mar Negro. Por mediación de Nacións Unidas e Turquía asinaron un acordo para renovar as exportacións de gran desde os portos ucraínos nunha solución á crise alimentaria derivada da falta de cereais nos países do mundo máis necesitados. En virtude do acordo, unha coalición de persoal turco, ucraíno e da ONU supervisará a carga de grans nos buques nos portos ucraínos antes de navegar por un roteiro planificado previamente a través do mar Negro.
Os barcos cruzarán o mar Negro cara ao estreito do Bósforo, en Turquía, onde se establecerá un centro de coordinación conxunto en Istambul, que inclúe representantes da ONU, Ucraína, Rusia e Turquía. Pola súa banda, tanto Rusia como Ucraína comprométense a suspender calquera ataque contra os barcos ou os portos que participen nestas exportacións. No encontro, que tivo lugar en Turquía, estiveron presentes -ademais do ministro de Defensa de Rusia, Sergei Shoigu e o ministro de Infraestruturas de Ucraína, Oleksander Kubrakov-, o secretario xeral da ONU, António Guterres, que interrompeu as súas vacacións para participar na firma do acordo, e o anfitrión, o presidente turco, Recep Tayyip Erdogan.