Os soldados ucraínos apertan os dentes nas zonas que aínda controlan do Donbás, mentres esperan a chegada das armas prometidas por Occidente. Armas de maior alcance e precisión, incluídos mísiles e drons de combate, coas que esperan poder frear o lento, pero seguro avance das tropas rusas. Os bombardeos son cada vez máis intensos en Sloviansk. As autoridades pediron á poboación que se vaia mentres aínda sexa posible. Fai tres meses esta cidade tiña máis de 100.000 habitantes. Hoxe é unha cidade pantasma, sen electricidade e con problemas de abastecemento. Desde Moscova, o portavoz do Ministerio de Defensa ruso dixo que os mísiles e a artillería alcanzaron 131 postos de mando o mércores. Engadiu que Rusia freou a entrada de «mercenarios» estranxeiros que querían loitar xunto ao exército ucraíno.