A solidariedade e a política impuxéronse á música no festival de Eurovisión. Ucraína fíxose co cobizado micrófono de cristal, que non é o único premio pola vitoria. Tamén levan o agasallo, ás veces envelenado, de acoller a gala da próxima edición. E Ucraína confía en poder facelo nunha «Mariúpol libre, pacífica e reconstruída», segundo dixo o propio presidente Volodímir Zelenski, quen celebrou que «o valor de Ucraína impresiona ao mundo». Esta é a terceira vitoria de Ucraína no maior festival de música en Europa tras as edicións de 2004 e 2016, dous anos despois da anexión da península ucraína de Crimea por parte de Rusia. Desde a destruída Ucraína, a noticia acolleuse con orgullo e esperanza. A Radio Televisión Pública Española (RTVE) ofreceuse a organizar o certame de 2023 se Ucraína non puidese facelo.
43