A guerra en Ucraína está a piques de chegar aos 200 días e o primeiro ministro ucraíno Denys Shmyhal aproveitou o seu encontro en Bruxelas con representantes da Unión Europea para pedir máis apoio militar, máis axuda financeira e maiores represalias contra Rusia. Durante o 8º Consello de Asociación UE-Ucraína, Shmyhal deixou claro que Ucraína segue necesitando a axuda europea. E a UE non quere dar marcha atrás no seu compromiso «A principal mensaxe do encontro hoxe para todo o mundo é que a Unión Europea seguirá apoiando a Ucraína, sexa cal for a ameaza, sexa cal for a chantaxe que Rusia poida facernos. Prestaremos o noso apoio político, financeiro, humanitario e militar, todo o tempo que faga falta e todo o que sexa necesario», asegurou o Alto Representante da UE para a Política Exterior, Josep Borrell.