A intelixencia militar ucraína (GUR) reivindicou este mércores o atentado con coche bomba que custou a vida a Filiponenko, acusado de torturas masivas.
“A operación especial para a liquidación do verdugo Filiponenko foi executada xunto con membros do movemento de resistencia”, expresou nun comunicado o GUR, que colaborou noutras ocasións con ucraínos contrarios á ocupación rusa en Ucraína.
Segundo o GUR ucraíno, Filiponenko “participou na organización de campos de tortura nos territorios ocupados da rexión de Lugansk, onde os prisioneiros de guerra e os reféns civís sufrían torturas inhumanas”.
A provincia ucraína de Lugansk foi, xunto a parte da veciña Donetsk, escenario en 2014 dunha rebelión armada protagonizada por milicias separatistas prorrusas apoiadas polo Kremlin, que declararon alí dous enclaves separados de Ucraína.
Filiponenko -ao que o GUR define como un “criminal de guerra”- está considerado un dos fundadores desas milicias e ocupou o posto de ministro do Interior en Lugansk despois de que se fixesen co control do territorio.
O ano pasado Filiponenko foi obxecto doutro atentado con coche bomba.