A execución do proxecto de humanización de catro rúas no núcleo urbano da Laracha está practicamente rematada. As primeiras actuacións realizáranse nun tramo da Avenida Fisterra, á altura do cruce coa rúa da Coruña, onde foi ampliada a beirarrúa.
A continuación traballouse simultaneamente nos outros tres puntos de intervención previstos. Un deles é a rúa Médico David Mallo Gómez, que nace fronte ao centro de saúde da Laracha e comunica as rúa Santa Lucía e Arxentina. Os outros dous son as rúas Enrique Muiño e Uruguai, perpendiculares á rúa Médico David Mallo Gómez.
O proxecto consistiu na ampliación das beirarrúas para priorizar o tránsito peonil en condicións de seguridade e accesibilidade universal, a renovación do pavimento da calzada -incluíndo os espazos de aparcamento- e na correspondente sinalización horizontal e vertical para establecer o sentido único de circulación que aumentará a seguridade viaria no entorno. Precisamente os últimos traballos que restan por realizarse consisten na pintura viaria. A actuación tamén incluíra melloras das redes de saneamento e recollida de pluviais e a canalización soterrada para o servizo de iluminación pública.
Este proxecto está valorado en 122.000 euros e dá continuidade e outras actuacións promovidas polo Concello da Laracha co obxectivo de humanizar os núcleos urbanos, facelos máis accesibles para os peóns, dotalos con mellores servizos, renovar o pavimento e reordenar o tráfico reforzando a seguridade viaria e a comodidade dos condutores.