O primeiro dos sinistros activouse ás sete e cuarto da mañá deste xoves tras recibirse unha chamada do 112 Emerxencias Galicia. Foi o propio dono da vivenda o que actuou con celeridade apoiado dun extintor o que evitou males maiores. Os equipos de urxencias desprazáronse ao domicilio ubicado na rúa Vázquez de Parga 99 e comprobaron que o lume se orixinou na parte posterior dunha neveira, que foi retirada, do mesmo xeito que un conxelador e parte dos mobles anexos, que tamén resultaron afectados polas chamas. Non houbo que lamentar danos persoais e os materiais afectaron á cociña, aínda que o fume se estendeu por todo o inmoble, polo que os bombeiros procederon a ventilar todo o piso cun ventilador de presión positiva. Ao lugar tamén acudiu unha patrulla da Garda Civil.
Accidente de tráfico a poucos metros
Pasadas as seis da tarde deste xoves, a uns 20 metros do anterior suceso, tamén se producía un accidente leve entre dous turismos. Ao lugar acudiu unha patrulla da Policía Local que regulou o tráfico rodado ata a chegada dun guindastre que procedería á retirada dos turismos implicados no sinistro. Por sorte, non houbo que lamentar danos persoais de consideración.