Unha persoa foi evacuada a un centro hospitalario despois de producirse un accidente na AC-164, ao seu paso polo concello de Bergondo, na Coruña.
De acordo cos datos recollidos polos xestores do 112 Galicia, dous coches estiveron implicados no sinistro e un deles chocou contra un restaurante ao paso pola rotonda dos Condes.
Con todo, a persoa afectada estaba liberada e accesible e a intervención dos bombeiros e membros de Protección Civil serviu para a retirada do coche accidentado e a revisión da estrutura da edificación alcanzada.
Foron os efectivos de Protección Civil de Bergondo os que chamaron ao 112 para informar da situación e solicitar equipos de intervención que puidesen atender aos posibles feridos.
Malia haber outro turismo implicado, só o ocupante dun deles necesitou asistencia médica, polo que tamén interviñeron os profesionais de Urxencias Sanitarias de Galicia-061.
Pola súa banda, os efectivos de emerxencias, Bombeiros de Betanzos, voluntarios de Protección Civil da localidade e axentes da Garda Civil de Tráfico, encargáronse de restablecer as condicións de seguridade na vía. Ademais, desde o 112 avisouse tamén ao servizo de mantemento das estradas.